لاہور (خصوصی رپورٹ) اندرون شہر میں سرکاری کمرشل پراپرٹی لیز پر لینے والوں نے سرکاری خزانے کو 31 ارب روپے کا چونا لگا دیا۔ اینٹی کرپشن نے ڈپٹی کمشنر لاہور آفس کی نزول برانچ کی طرف سے چالیس سال کے دوران لیز پر دی گئی پراپرٹی کے کرائے وصول نہ کرنے کے معاملے کا نوٹس لے لیا ہے۔ ڈائریکٹر اینٹی کرپشن لاہور ریجن محمد اصغر جوئیہ نے چالیس سال کے کرائے کی مد میں 31 ارب روپے کی ریکوری کے لئے ڈپٹی کمشنر لاہور کو خط لکھ دیا۔ اینٹی کرپشن کو موصول ہوے والی تفصیلات کے مطابق اندرون شہر میں کمرشل پراپرٹی لیز پر لینے والوں نے 1978ءسے ایک روپے کرائے بھی ادا نہیں کیا۔ اندرون لاہور میں حکومت پنجاب کے 18 ہوٹل‘ ایک فیکٹری‘ 10 کمرشل گودام‘ 780 گھر اور 1970 دکانیں لیز پر دی گئی ہیں۔ ڈی سی آفس لاہور کی نزول برانچ گزشتہ چالیس سال سے ان کمرشل جائیدادوں کے کرائے وصول نہیں کررہی ہے۔
