نئی دہلی(آئی این پی) زمین سے فضا اور سمندر میں جوہری ہتھیار چلانے کی صلاحیت کے حامل بھارت میں بنی پہلی ایٹمی آبدوز کی پیٹرولنگ مکمل ہوگئی ہے ۔ بھارت جس کے شمال میں ایٹمی قوت کا حامل چین اور مغرب میں ایٹمیطاقت رکھنے والا پاکستان موجود ہیں، بھارت دونوں ممالک سے جنگیں کر چکا ہے،بھارتی وزیر اعظم نریندر مودی کا کہنا تھا کہ ’آئی این ایس اریہانت ایٹمی دھمکی دینے والوں کو کرارا جواب ہے۔تاہم انہوں نے اپنے بیان کی مزید وضاحت نہیں کی۔بھارتی نشریاتی اداروں پر نشر ہونے والے نریندر مودی کے آبدوز کے عملے سے خطاب میں ان کا کہنا تھا کہ ’ہمارے اطراف میں ایٹمی ہتھیاروں کی تعداد میں اضافے کو مدنظر رکھتے ہوئے ہماری قومی سلامتی کے لیے ان کا جواب دینا انتہائی ضروری ہے۔ان کا کہنا تھا کہ اریہانت ہمارے دشمنوں کے لیے کھلی دھمکی ہے۔ بھارت کیخلاف کوئی بھی سازش نہ کرے۔واضح رہے کہ بھارت کے چین کے ساتھ تعلقات بحالی کی جانب جارہے ہیں،بالخصوص تجارتی امور میں تاہم پاکستان کے لیے نریندر مودی نے سخت حکمت عملی اپنا رکھی ہے۔
