لاہور (مانیٹرنگ ڈیسک)سابق وزیراعظم نوازشریف کے بیرون ملک جانے سے متعلق افواہیں زیر گردش ہیں اور اب انکشاف ہوا ہے کہ نوازشریف اور ان کی صاحبزادی مریم نواز کے لیے اعلی حکومتی عہدیداروں کے احکامات پر قومی ایئرلائن کی پروازوں میں روزانہ کم ازکم 10 نشستیں رکھی جارہی ہیں ، نوازشریف اور مریم نواز کی لندن روانگی متوقع ہے جہاں کلثوم نواز شریف زیرعلاج ہیں۔ یہ بھی انکشاف ہوا کہ تین نجی ایئرلائنز مسلسل چار دن شریف فیملی کے مذکورہ افراد کیلئے اپنی نشستیں محفوظ رکھتی رہیں لیکن بعدازاں بکنگ منسوخ کردی گئی جس کی وجہ سے کمپنیوں کو نقصان بھی اٹھانا پڑا۔ یادرہے کہ کلثوم نواز کے بلڈ کینسر کے دعوے منظرعام پر آئے تھے لیکن اس کی شریف فیملی اور بالخصوص مریم نوازشریف نے تردید کرتے ہوئے بتایاکہ انہیں گلے کے ایک حصے میں کینسر ہے اور ابھی ابتدائی مراحل میں ہے اور علاج شروع کردیاگیا۔
