ملتان(تجزیہ نگار) سابق وزیرقانون اور مسلم لیگ ق کے رہنما بشارت راجہ کی اہلیہ اور سابق رکن پنجاب اسمبلی سیمل راجہ نے ملتان پریس کلب میں ایک پُرہجوم پریس کانفرنس سے خطاب کرتے ہوئے مطالبہ کیا کہ راجہ بشارت کے خلاف حدود آرڈیننس کے تحت مقدمہ درج کیاجائے کیونکہ انہوں نے پری گل آغا کو طلاق دینے کے باوجود گھر میں رکھا ہوا ہے اور مروجہ قوانین اور اسلامی تعزیرات کا بھی مذاق اڑارہے ہیں۔ انہوں نے کہا کہ وہ ایک مسلمان خاتون کی حیثیت سے راجہ بشارت اور ان کی جماعت کو ایک ہفتہ کی مہلت دیتی ہیں کہ اگر طلاق یافتہ عورت کو گھر سے نہ نکالا تو وہ سول سوسائٹی کے ساتھ مل کر گھر کے باہر دھرنا دیں گی۔ سیمل راجہ نے مزید کہا کہ راجہ گینگ اپنی بہو بیٹیوں اور بہنوں کو سورس کے طور پر استعمال کرتا ہے۔ انہوں نے عورت کو سیٹیں لینے کیلئے سیڑھی بنایا ہوا ہے۔ انہوں نے کہا کہ ان کا تعلق کسی سیاسی جماعت سے ہے نہ وہ کسی سیاسی جماعت کی آلہ کار ہیں۔ وہ ایشو بیسڈ سیاست کرتی ہیں۔ انہوں نے کہا کہ سیاستدانوں کا یہ وتیرہ رہا ہے کہ شادیاں کرکے مکرجاتے ہیں مگر راجہ بشارت جس معاشرتی برائی کی ابتدا کررہے ہیں وہ پھیل گئی تو پورا معاشرہ تباہ ہوجائے گا۔ انہوں نے کہا کہ یہ پہلا سیاستدان ہے جو طلاق سے ہی مکرگیا۔ انہوں نے کہا کہ انہوں نے شیخ الاسلام سمیت سندھ پنجاب کے تمام مکاتب فکر کے علماءسے فتویٰ لیا۔ انہوں نے کہا کہ طلاق یافتہ خاتون اپنے بچوں کی آڑ میں بھی اپنے سابق شوہر کے ساتھ نہیں رہ سکتی کیونکہ وہ اس کیلئے نامحرم ہوگیا ہے۔ انہوں نے کہا کہ حمام میں سب ننگے ہیں۔ سیاستدان اپنی عورتوں کو پارلیمنٹ کے بازار حسن کی زینت بناتے ہیں۔ یہ لوگ بے شرم‘ بے ضمیر ہیں۔ پارلیمنٹ کے بارے میں کتاب شائع ہونے اور اندرونی کہانیاں منظرعام پر آنے پر کسی ممبرپارلیمنٹ نے رائٹر کو نوٹس نہیں بھجوایا نہ کوئی وضاحت کی۔ انہوں نے صحافیوں کو ناقابل تردید ثبوت پیش کئے اور راجہ بشارت اور ان کے بھائی کی ریکارڈشدہ گفتگو سنائی۔ انہوں نے کہا کہ پری گل کا کہنا ہے کہ ان کی 22سال قبل راجہ بشارت سے شادی ہوئی جبکہ نادرا کے ریکارڈ کے مطابق ان کا بیٹا1991ءمیں پیدا ہوا۔ اس کا ڈی این اے ٹیسٹ کرایاجائے تاکہ معلوم ہوسکے کہ وہ کس کا بیٹا ہے۔ سیمل راجہ نے بشارت راجہ سے شادی کے حوالے سے ثبوت پیش کرتے ہوئے کہا کہ لوگوں کے گھر اجاڑنے والے راجہ گینگ کے خلاف فوری کارروائی نہ کی گئی تو مزید قوم کی بیٹیوں کے گھر برباد ہوجائیں گے۔ انہوں نے راجہ گینگ کے طریقہ واردات پرروشنی ڈالتے ہوئے کہا کہ پہلے شادی شدہ خواتین کے گھر برباد کرکے ان کی جائیداد ہڑپ کرلیتا ہے پھر جان چھڑانے کیلئے مختلف الزامات لگاکر انہیں بدنام کرتاہے۔ شادی اور طلاق سے مکرنا ان کا وتیرہ ہے۔ سیمل راجہ نے بتایا کہ ڈرامے رچاکر پہلے ان کا اڑھائی کروڑروپے مالیت کا زیور اور 22لاکھ روپے مالیت کی گاڑی ہتھیائی گئی۔ بعدازاں راستے سے ہٹانے کیلئے یکے بعد دیگر تین قاتلانہ حملہ کروائے گئے۔ انہوں نے کہا کہ وہ گھبرانے والی خاتون نہیں۔ وہ قوم کی بیٹیوں کا گھر برباد کرنے والوں کے خلاف جہاد کررہی ہیں۔ سیمل راجہ نے کہا کہ چودھری شجاعت حسین اور چودھری پرویز الٰہی تو یتیم بچیوں کی سرپرستی کرتے ہیں ان کے سر پر ہاتھ رکھتے ہیں لیکن پتہ نہیں ان کی کیا مجبوری ہے کہ وہ حقائق جاننے کے باوجود خاموش ہیں اور کچھ لے دیکر معاملہ طے کرنے کا مشورہ دے رہے ہیں۔ خاتون نے راجہ بشارت کو مناظرے کا چیلنج دیتے ہوئے کہا کہ اگر ان میں اخلاقی جرا¿ت ہے تو وہ میڈیا کے سامنے آکر ثابت کریں کہ انہوں نے پری گل آغا کو تین بار طلاق نہیں دی۔ انہوں نے عدالت عظمیٰ سے اس صورتحال کا نوٹس لینے اور ذمہ داران کو کیفرکردار تک پہنچانے کا مطالبہ کیا۔ انہوں نے کہا کہ وہ اپنے مطالبات سے کسی صورت پیچھے نہیں ہٹیں گی۔ ان کے ساتھ سول سوسائٹی کی خواتین سیدہ عابدہ بخاری‘ نبیلہ بٹ‘ فریال خان اور شازیہ نے یکجہتی کا اظہار کیا۔
سیمل راجہ
