لاہور(کلچرل رپورٹر)اداکار احسن خان نے چار ایوارڈ حاصل کرکے مقبولیت میں نعمان اعجاز، ہمایوں سعید اور فیصل قریشی سمیت بہت سے فنکاروں کو پیچھے چھوڑ دیا ہے۔تفصیلات کے مطابق احسن خان نے گزشتہ ایک ماہ میں ملک میں ہونے والے چار بڑے ایوارڈ اپنے نام کئے جو انہیں ڈرامہ سیریل ”اڈاری“میں بہترین منفی کردار کرنے پر ملے ہیں جبکہ اس سے پہلے منفی اور مثبت کرداروں پر اس طرح کے اکثرایوارڈ فیصل قریشی اور ہمایوں سعید سمیت دیگر فنکار حاصل کرتے رہے۔ اس بارے میں احسن خان نے”خبریں“سے گفتگو کرتے ہوئے کہا کہ کبھی بھی اس مقصد کے پیش نظرکام نہیں کرتا کہ مجھے ایوارڈ ملے کیونکہ میرااصل ایوارڈ شائقین کی محبت ہے جو مجھے ہر ڈرامے کی صورت میں ملتی ہے۔ایک سوال کے جواب میں احسن خان نے بتایا کہ میں اب ڈراموں کے ساتھ ساتھ فلموں کو بھی ترجیح دے رہا ہوں اور میری دوفلمیں”رہبرا“اور”چھپن چھپائی“تکمیل کے آخری مراحل میں ہیں۔
