پشاور(نیوزایجنسیاں ) پاکستان سپر لیگ کے سیز ن 2کی فاتح ٹیم پشاور زلمی کے مالک جاوید آفریدی نے مطالبہ کیاہے کہ پی ایس ایل 3کے کچھ میچز بھی پشاور میں ہونے چاہئیں جس پر بنگلہ دیشی کھلاڑی نے بھی ان کا ساتھ دینے کا اعلان کر دیاہے۔ لاہور میں پی ایس ایل کے کامیا ب فائنل کے بعد اب پشاور زلمی یہ مطالبہ کرتی ہے کہ پی ایس ایل تھری کے میچز پشاور میں بھی ہونے چاہئیں۔ تاکہ شائقین کرکٹ اور کھلاڑی پشاور کی مہمان نوازی کا لطف اٹھا سکیں۔جاوید آفریدی کی جانب سے اس ٹویٹ کو بنگلہ دیشی کھلاڑی تمیم اقبال خان نے ری ٹویٹ کیا جس سے ان کی پاکستان سپر لیگ میں دلچسپی دکھائی دیتی ہے اور کھیل سے محبت رکھنے والا ہر کھلاڑی ہی دنیا کے ہر پلیٹ فارم پر پرفارم کرنے کی خواہش رکھتاہے۔تمیم اقبال نے جاوید آفریدی کے اس ٹویٹ پر اپنا رد عمل دیتے ہوئے کہا کہ ’انشااللہ میں 100فیصد جاوید آفریدی کے ساتھ ہوں‘۔