لاہور (خصوصی رپورٹ) لاہور ہائیکورٹ نے عبوری حکم کے ذریعے دو کنال سے بڑے گھروں پر عائد لگژری ٹیکس کی وصولی روک دی۔ لاہور ہائیکورٹ کے مسٹر جسٹس مزمل اختر شبیر نے شاہ محمد سمیت 9شہریوں کی درخواست پر سماعت کی جس میں بڑے گھروں سے لگژری ٹیکس کی وصولی کو چیلنج کیا گیا۔ درخواستوں میں بتایا گیا کہ درخواست گزار پہلے سے ہی ٹیکس دے رہے ہیں‘ اب ان سے لگژری ٹیکس کی وصولی کیلئے نوٹس جاری کردیئے جس کا کوئی جواز نہیں ہے۔ درخواستوں میں یہ قانونی نکتہ اٹھایا گیا ہے کہ ایک وقت میں دو ٹیکس وصول نہیں کئے جا سکتے اس لئے محکمہ ایکسائز کو لگژری ٹیکس کی وصولی سے روکا جائے۔ ہائیکورٹ نے محکمہ ایکسائز سے چار ہفتوں میں جواب مانگ لیا ہے۔
