اسلام آباد(ویب ڈیسک) وزیراعظم نوازشریف کا کہنا ہے کہ 2007 میں پرویز مشرف نے ڈیل کی کوشش کی لیکن ہم نے ہر قسم کی ڈیل سے انکار کردیا۔اسلام آباد میں وزیراعظم نوازشریف کی زیرصدارت مسلم لیگ (ن) کی پارلیمانی پارٹی کا اجلاس ہوا جس میں ارکان قومی اسمبلی اور سینیٹرزشریک ہوئے۔ ایک گھنٹے سے زائد جاری رہنے والے اجلاس میں ترقیاتی فنڈز میں تاخیر پر ارکان نے وزیراعظم سے احتجاج کیا جس پروزیراعظم نے کہا کہ ارکان کو ترقیاتی فنڈز ترجیحی بنیادوں پردیئے جائیں گے۔تفصیلات کے مطابق اجلاس میں پاناما کیس پر بھی بات ہوئی جس پر وزیراعظم نوازشریف نے کہا کہ مخالفین کے الزامات کو سنجیدہ نہ لیا جائے،2007 میں جنرل مشرف نے بھی ڈیل کی کوشش کی مگر ہم نے ہر قسم کی ڈیل سے انکار کردیا۔ انہوں نے کہا دہشت گردی کے خاتمے کے لیے فوجی عدالتوں کی بحالی ضروری ہے۔اجلاس میں وزیراعظم نے ارکان پارلیمنٹ کو اگلےعام انتخابات کی تیاری کی ہدایت کرتے ہوئے کہا کہ یہ آخری سال ہے ،ارکان ترقیاتی کام کریں جب کہ وزیر اعظم بھی چاروں صوبوں کے دورے کریں گے۔
